ايامنا الحلوه

النصر يارب

2012-02-02T18:47:00.000-08:00

"وعزتى وجلالى لأنصرن من لا حيلة له حتى يتعجب أصحاب الحيل"..حديث قدسى
يارب وعدك حق انصر الحق يارب
يارب وعدك حق انصر الحق يارب

ولد لسه ملحقش يحلم حلم كتب وصيته وبيهزر ومش راهب الموت ولا خايف منه
في حين ان ناس وصلت لسن الكهوله متبته في حته كرسي خايفه يحصلها ايه بعدة
يارب نصرك يارب
يارب
يارب
يارب
يارب
يارب
يارب
يارب

المشين

2012-02-01T15:13:00.000-08:00

المشين حسين طنطاوي
يسقط حكم السفاحين
يسقط حكم المجرمين
يسقط حكم الماجورين
يسقط حكم القاتلين
يسقط حكم تجار الدين
يسقط حكم الموتورين
حسبنا الله ونعم الوكيل

ربع مشكل

2011-02-13T18:56:00.000-08:00

لكل صاحب مال او سلطه ظالم (اعلم ان للغني والسلطة معاني اخري)

لكل الشعب المصري
النافذة التي يخرج منها الهواء الفاسد هي نفس النافذة التي تسمح بدخول الهواء الصالح (ومش النظام بس هو فاسد كثيرا من الفاسدين يرتدون ثوب العفة والحية بتتلون )

الناس اللي بتعتبر اي حد ايد مبارك (وله اسبابه قد تكون تافها من وجهة نظرك قد تكون عاطفة حتي او وجه نظرة كده يااخي هو حر فيها عميل وخاين )

عزيزي هذه قمة الديكتاتورية فلماذا خرجت مناديا لاسقاط ديكتاور عليك اولا اسقاط نفسك

الناس اللي مش راضية تسمع غير صوتها مع ان في اصوات تانية ممكن تتسمع

If you have an apple and I have an apple and we exchange these apples then you and I will still each have one apple. But if you have an idea and I have an idea and we exchange these ideas, then each of us will have two ideas.

نظرية المؤامرة والشك في الاخر وعدم اللي مسيطرة علينا او علي بعضنا

اعزائي لاتحولوا الوطن الي جبانات لدفن الموتي

محدش يدي ودنه لحد ياجماعه قول رائيك وميهمكش وحكم ضميرك حط صوابعك في عين التخين انت لاخاين ولا عميل ده رائيك زي ماهو رائية وعليه يحترمك زي مابيطالب باحترام رائية

اوعوا تعملوا بحكاية شراء اسهم بالبورصه دي كمان انها لنصبايه عظيمه (من واحد بورصجي قديم نيهاااااااا)

حمد لله علي سلامتك يامصر

2011-02-11T19:17:00.000-08:00

البقاء لله.... ياورد مصر

اخاصمك اه .......اسيبك لا

2011-02-10T15:07:00.000-08:00

ليه بس كده ياابو علاء انت مقدرتش عليهم بالبلطجيه ولا بالشرطه ولا بالرصاص الحي ولا بالقنابل المسيل للدموع
ناوي تموتهم بالسكر بالضغط مشللوين يااما بالسكته القلبيه
ياراجل عيب عليك بقي زودتها ياريس
ياريس بلاش بيانات تاني والنبي العيال شوباب ودمهم بيغلي منضمنش يعملوا ايه
انت كل ماتيجي تكحلها تعميها

اكرهك ولكن .....؟!

2011-02-04T09:10:00.000-08:00

السيد رئيس جمهورية مصر العربية سواء شئنا ام ابينا انا ممن يكرهونك حقا بمعني كلمة كراهية لاني ابلغ من العمر २४ عام فلم اكن شاهد عيان علي حرب ७३ ولا علي ضربتك الجويه المزعومة كانك بتحارب لواحدك مع انك عمي استشهد في الحرب ولكني في ذات اللحظه شاهد عيان علي مشروع توشكي والجدار العازل والكويز وغرق العبارات وحرق القطارات وماالي ذلك لسنا بصدد ذكره

............................................

انا فتاة اعاني من فيروس بالمعدة غلبت والله في علاجة ياريس مابيتعالجش بسبب مااكلته من خضار مسرطن ومااروي به ظمائي من ماء صرف صحي ومع ذلك عندما اصابتك وعكه صحية لم ابادر بالدعوة (ربنا يخدك مثلا ) ولكن تمنيت لك الشفاء العاجل لاني اعلم جيدا فظاعة المرض

...........................................................

انا فتاة شاهد عيان علي مااصاب احدي اقاربي من بطش هي وصغارها من قبل رجالك كون زوجها الكفيف يطلق لحيته ومشكوك في انتمائه للاخوان المسلمين ولم تنجوا هي واسرتها من بطش نظامك الا بفقد عائلها كأن عداله السماء انقذتها هي واطفالها من هلاك محقق
ومع ذلك عندما تعرضت لاعتداء في محاوله لاغتيالك مقلتش مثلا (كلب وغار ) ولكني وبصدق ومن كل قلبي قلتها حمد الله علي سلامته لا ني اعلم جيدا ان لك بيت واسرة وزوجه هم بحاجه اليك علي اقل تقدير

..........................................................................
انا فتاة شاهد عيان علي فقدان اعز صديقاتي (وبنت عمتي كمان)في حادث سيارة اثيم فافيق من غفلتي اجدني ملطخة بدمائها الطاهرة واجدها بجواري جثة هامدة وماتبع ذلك من اثار نفسية اعاني منها حتي هذة اللحظه التي اكتب فيها بل واجد الجاني حرا طليقا لم ينل جزائة نظرا لثغرات في الاجراءات والقانون استطاع ان يفلت بجريمته ومع ذلك لما حفيدك مات عيط من قلبي ومقلتش مثلا ( خليه يشرب من نفس الكاس ) لاني عارفة ان اللهم لاشماته والموت ده قضاء وقدر وكلنا معرضون له
......................................................................
انا ياريس وان صح التعبير اسرتي من من يملكون منزل وسيارة وشويه فلوس في البنك من شقي عشر سنين في احدي الدول العربية
ومع ذلك لقينا نفسنا بندفع ضرايب عقاريه ودفعناها دون اعتراض ومقولناش مثلا اشمعني حيتان رجال الاعمال هما هيبصولنا في حته البيت لاننا عارفين ان الضرايب حق الوطن وقلنا وماله ندي احنا الوطن حقة وملناش دعوه بالناس التانين ومتقولش ايه اديتنا مصر قول هندي ايه لمصر
..............................................................................
انا ياريس من ملايين عانوا من البطاله ولما حصلت علي وظيفة تناسب مؤهلي بالواسطة صب علي ابي جم غضبة لاني باخد فرصة مش بتاعتي واجبرني طائعة علي تركها معللا حتي لو مخدهاش من هو اكفاء مني الا انني لن اكون سبب في مزيد من سخط وغضب وخنقة زملائي لعدم قدرتهم علي الحصول علي مثلها رغم انهم اكفاء مني واستجبت له ومقلتلوش اشمعني انا مالبلد ماشية بالواسطة ومقلتلوش مثلا اشمعني ابن الريس لاني من من امانوابمبداء ابدء بنفسك اولا
..................................................................
انا ياريس من من اتجهوا للمشروعات الصغيرة ولقيتني اخر السنه بدفع ثلاث ارباع المكسب ميه ونور وضرايب وصدقني مقلتش ليه كده اشمعني احمد عز لاني مؤمنة انه مش معني ان ده شخص حرامي ابقي انا حرامية زيه وان اللذي يحاسب العباد رب العباد
.............................................................
انا ياريس شاهد عيان علي بطش كلاب نظامك بابناء وطني وبعض زملائي انا ياريس شاهد عيان علي زمايلي اللي كانوا بينزلوا الامتحانات بالكلبشات لان لهم رائي انا شاهد عيان علي زمايلي اللي بيضربوا بالجزمة في المظاهرات ولكن زعلت جدا لما لقيتهم رافعين عليك الجزم وبيسبوك في المظاهرات ومقلتش يستاهل ولا العين بالعين ولا السن بالسن والبادي اظلم مثلا
............................................................
ياريس انا بالرغم من كل اللي فات من من تاثروا بخطابك الاخير بالرغم من مايحمله من كبر وفخر بالذات زيادة عن اللزوم وتجاهل للاخر لاني اصلا كنت من قبل الخطاب مشفقة عليك من هذة اللحظه وكنت محضرة المناديل بل ودعوت الي اعطائك مهلة اخيرة للحفاظ علي ماتبقي لك من كرامة وانا لسه عند موقفي والله ياريس مغيرتهوش لاني علي الاقل مؤمنة ان وجب علينا احترام الكبير (سنا) ومراعاة انك في ارذل العمر
.........................................................

والان ياريس رغم مااحملة لك من كراهية ولي اسبابي لم اقدر علي حصرها كامله لكثرتها بالرغم مماعانيته وعناه غيري في عهدك من ويلات
الا اني اسالك الرحيل ليس لشئ الا لاني
اشفق عليك من مزيد من كلمة
حسبي الله ونعم الوكيل ربنا علي الظالم
من ام فقدت ابنها
من زوجه فقدت زوجها
من طفلة فقدت ابيها

ارحموا عزيز قوم ذل

2011-02-02T07:58:00.000-08:00

ياجماعه بقي كفايه كده انا لا بحب مبارك ولا حكمه انا واحدة اتخرجت واشتغلت في اي اي حاجه وكل حاجة غير المؤهل بتاعي زي زي الناس وكنت مع ثورة २५ ومع التغير لكن انا مش مع اللي بيحصل ده

هنبقي عراق تانية

الاقتصاد في النازل

امريكا وانجلتر وتركيا بتناقش امورنا (حمايه تاني)

اشكال غلط ركبت الموجه وكله بيغني علي كله

بس كده ياناس كفايه حرام عليكوا الراجل ماشي خلاص

عيب كده عيب ان الريس بتاعكم يترفع عليه الجزمه عيب ان مراته تتشتم في المظاهرات (في مناظر وحشه وهمجيه ومقرفه )

هو وحش وفي كل القرف كلنا عارفين بس البلد بتضيع هو هيمشي مش بالطريقه دي

انتوا كده بتعارضوا لمجرد المعارضه عاوزين تصوتوا وخلاص محدش عارف هو عاوز ايه

خلاص ماشي ارحمونا بقي مش هنفضل نايمين في الشارع قدام البيوت

الناس اللي تعرف ناس في التحرير ترجعها ياجماعه هو اتنازل وانتوا اتنازلوا حرام عليكوا كده

احنا مش تونس ومبارك مش بن علي وسيبوا التاريخ يحكم عليه زي اللي قبله عيب نطردة هو مواطن زيه زيكم وليه الحريه انه يعيش في بلده زيكم سيبوا له اخر ذرة كرامة افتكروا له اي حاجه ارحموا عزيز قوم زل الناس بتاكل في بعضها خلاص ومثال بسيط واقسم بالله مش بكذب (الاخوات بقوا بياكلوا في بعض في اخ استولي علي بيت اخواته بالبلطجية ووضع اليد مستغل الظروف اللي احنا فيها مابلك الغرب عيب كده ياناس عيب كده انا بجد من كتر العياط اعصابي باظت احنا شعب همجي ليه كده شعب ضايع ليه كده الراجل تعهد قدام العالم كلها مسؤل عن كلامة قدام العالم كلها روحوا بقي كفايه بقي كفايه حرام عليكوا كفايه بلاش جنان وتغيبوا عقلكوا

نهدي شويه (علي هامش حرب مصر والجزائر)

2009-11-22T01:25:00.000-08:00

بعد ماكل واحد قال اللي عنده ونشرنا غسيلنا اللي مش نضيف وفرشنا الملايه لبعضنا ده احنا عملنالكم وانتوا علتولنا تحولنا من ان احنا بقينا نشتم الجزائرين فبقي الشراشيح المصرين بيشتموا في بعض ياريت بقي نهدي شويه مش شايفنها غريبه مفيش حاجه غريبه في الليله دي مفيش حاجه مستغربينها ابدا مفيش حاجه واقفه في زوركم ومش راضيه تتبلع ده كده نبقي شعب تيت بالجامد يعني

الجزائرين يضربوا في مصر بعد الماتش

الجزائرين في نفس يوم الماتش يحاصروا المصرين في الجزاير ويكسروا الشركات

الجزائرين يوم السبت اللي هو يوم الماتش يعلنوا ان في جسر جوي هيكون بين الجزاير والسودان لمسانده المنتخب

كل شرشوح من الشراشيح اللي بيطبلوا في القنوات عارفين طبيعه تشجيع الجزائرين في الكورة

السودان تبعت تقول ان الجزائرين بيشتروا اسلحه بيضا

وبالرغم من ذلك الجمهور اللي يطلع ببلاش برضه سواء تبع البعثه الاعلاميه او تبع احمد عز والحزب بهوات عشان يتضربوا وميضربوش عشان يجروا قدام الجزائرين زي الفراخ ويتصلوا يصوتوا في القنوات الفضائيه وعند الاعلامين اصحابهم الحقونا بنضرب فيقوم الناس تشوف ده وتبقي مشحونه تاتا تا تا تتتتتتتتتتتتتتتتتتتتتتتتتتتتتتتتتتتتتتتا تظهر العصي السحريه والتعازيم البهلوانيه فتيجي بقي مجهودات نجلي الرئيس لانقاذ (اسلحه مصر الناعمه سمعوني زغروطه بقي ) ويدخلوا مصر امنين ويدخلوها سالمين ياحلاوه ياولاد

طيب تاني معايا بشويش

مين ياثر في الناس الغلابه اكتر وشباب الجامعات الفانكي والعيال الصغيره

ايهاب توفيق ولا مشجع من الدرجه التالته

محمدفؤاد ولا مشجع من ميت عقبه

هيثم شاكر ولا كبير مشجعي النادي الاهلي

اقلب الموقف كده وخلي اللي كان هناك مشجعين كوره عادين عاوزه اعرف بس رد فعل الاعلام واولهم الفنانين دول هيكون ايه؟

احنا اشقاء ياكماعه واحنا الام ولازم نغفر مش ماتش كوره اللي يخسرنا بعض ولامانع من احتفاليه يغني فيها مطربين مصر والجزاير
وطبعا يصدعونا باوبريت الحلم العربي علي كل الكنوات

كمان ياريت بالراحه كده حد يجاوبني علي الاسئله دي انا مجنونه حد عاقل يجاوبني

1_ ليه تعبئه الشعب والهائه بقضايا مشاهير بتعمل فرقعه

( شوبير ومرتضي _ نور وخالد _ الفنانين في الجزائر) وبعدين يتردم علي كله ومحدش يطلع غلطان في الاخر كلهم ولاد ناس طيبين؟

2_ ليه بالرغم من كل التحذيرات والتوقعات والفتات والسلطات اللي را ح الماتش نوعيه الجمهور دي ؟

3_ ايه رد الفعل اللي كنا هنشوفه لو الناس دي مشجعين غلابه الدرجه التالته ؟

4_ هو احنا ليه شعب عاطفي ساذج ؟

5_ هو احنا ليه المثقفين بتوعنا واسلحتنا الناعمه اصبحت شويه راقصات علي فنانين علي لعيبه كورة

هو العلم اصبح في الخصور والنهود والاقدام لا الرؤس؟

علي الهامش :

مكالمه الاستاذ علاء مبارك علي انه مواطن مصر كيفتكم اتكيفوا كمان وكمان الاستاذ علاء بيتكلم عن كرامه مصر المهانه حضرتك لسه فاكر كرامه مصر المهانه

ياجماعه حد من المغتربين في اي بلد عربي او اوربي يفكر الاستاذ علاء بكرامتنا المهانه
ياشباب حد من اهالي الناس اللي غرقه في العباره يفكره بكرامتنا المهانه ياولاد حد من قرايب الدكاتره اللي اتجلدوا يفهموه كرامه مصر المهانه يابني ادمين حد من اهالي الناس اللي ماتت في القطارات يعرفوه ايه هي كرامه مصر المهانه حد من الناس اللي جت لهم جثث اهاليم في نعوش يشرحوله ايه هي كرامه مصر المهانه ياولاد حد من الناس اللي اهلهم اتهانوا في اقسام البوليس يفكروا بكرامه مصر المهانه ياناس حد من اللي ولادهم بيضربهم الامن المركزي في قلب حرم الجامعه يفكروا بكرامه مصر المهانه
يابشر حد من اللي بيتعامل مع مستشفيات حكوميه زاير او متزار يوضح له ي عني ايه كرامه مهانه
يابشر حد يقولي فين الاقي كرامه مصر ويفكرني برضه امتي مكنتش مهانه
يااستاذ علاء انت بتكلم الشعب وبتقوله مش لازم نسكت (يعني ايه يمسك الجزائرين في مصر يضربهم ولا يعمل ايه الشعب ياريت توضح ليه بس) الابدي تخبط علي باب الاوضه اللي جنبك وتقولي لبابي بليز بليز يرجعلنا كرامتنا المهانه؟

هو احنا ليه شعب بؤؤؤؤؤؤؤؤؤؤؤؤؤؤؤؤؤؤؤؤؤؤؤؤ؟

وانا اهو وانت اهو ان ما طلعنا من الحكايه دي احنا الغلطانين ابقي عيله مبعرفش حاجه

...................................................

الشاعر جمال بخيت بجد بجد بجد حضرتك راجل محترم وانت الوحيد اللي سمعته قال كلمتين يتسمعوا

لقاء العمالقه ......... بسويسرا (المنصورة)

2009-11-07T10:05:00.001-08:00

الحكايه بدئت ان انا عرفت ان في لقاء للمدونين في المنصورة الكلام ده يوم الخميس وعلي راس الحاضرين فاتيما طمطاطم قلت لا
ينكن لازم ارحب بيها عندنا
صحيت مبكرا الساعه 11 كده وتلفنت للبت ايه صاحبتي علي اساس اني بعاملها معامله السواق بتاعنا الايام دي وقلتلها تيجي معايا كورس العلاج الطبيعي بتاعي رحنا والدكتوره بسمه ربنا يخليها دخلتني بدري علي قد ماتقدر خرجت من عندها تقريبا واحده وشويه وتلفنت
لام مريم وطلبت منها تستناني علي الباب لان انا معرفش حد فقالت احنا بناكل يابنتي ادخلي علي طول قشطه ياصبصب (بالهنا والشفا ياام مريم ) وايه طبعا وانا بكلم ام مريم نازله اخلصي يلا هنرجع البيت واللا هتروحي انت ولا انا سمعت ام مريم ولاحتي هي سمعتني قلت انا هروحي واخبط بقي في الناس وقلت للسواقه بتاعتي تيجي معايا قالت لا طريق اخضر
وصلت كوك دور لقيت استاذ خالد (عرفته صراحه عشان صورة في اللقاءات التانيه ) سالت علي ام مريم وكانت ام مريم
بتواصل اكل برضه هههه انا مش بقر انا بحسد بس سالتها علي فاتيما وسلمت علي فاتيما وخيخه وطلبت انا اكل
وقعدت مع
ايمان سما مصر
ودعاء مجر د حلم
ومي حلم كان
وحد تاني مش مدون بنوته عسوله كده
والناس التانيه خلصت اكل وانا طبعا اكلي كان لسه واصل فالمدونين كلهم نزلوا طلخا والبنانيت العساسيل
ايمان ودعاء ومي ربنا يخليهم فضلوا لحد ماانا خلصت اكل ورحنا النادي والعدد صراحه كان رهيبه وانا كنت مخضوضه كعاتي من الزحمه
وهناك شفت سارة طوبار رحيل المنزلويه اجدع ناس
وهنا ايه تلفنت ليه عشان ميعاد تيته للدكتور جه وايه قالت ليه هسبقك علي بيتكم لو مش جيتي همشي وقضوها تاكسيات فلميت شنطتي وجريت الحق الطقه دي
فاتيما عسووووله وتنفع اخت يوسف مش مامته كتكوكته واموره وطيوبه وكل حاجه حلوة
خيخه صغنونه وعسل وجدعه كده وتتحب وضربت كيك كتير
دعاء مجرد حلم دكتورة صيدليه وصغيورة ومن المنصورة فشاهدتي مجروحه في بنات المنصورة
ايمان سما مصر طيوووووووبه وعسوله وهاديه ومنصوريه برضه
ومي اصغرنا وسكوره وربنا يوفقها في دراستها يارب
ساره عسوله موت وتدخل القلب ومنزلاويه يعني الحب كله
وايه صحبتي عملي هههه نمشيها الابيض وقفت الطريق في الجلاء وسواقين التاكسي لعنوا اللي خلفونا بالجامد وجدتي كانت هتضيع مننا
خلاص
يوم كان جميل ونورتي المنصورة يافاتيما ياحبيتي بجد فرحت موت اني شفتك

المنزلة رايح ومش جاااااي

2009-10-14T09:37:00.000-07:00

يوم انتصار اكتوبر العظيم تصادف فكرة براسي هوي في نفسي لزيارة صديقتي لمؤزارتها بعد وفاة والدها رحمه الله استعد لرحلتي المجهوله صارخه جيااااااااالك يامنزلة

في موقف السيارات اجد الحاله نايمه حقا والمنادي راكبه عفريت علي ما أظن يدعي منزله منزله مناديا اياي منزله يابطه ما شأني انا وهذه البطه في موجه الانفلونزا التي تجتاح البلاد فأمي شفاها الله اكدت لي انه تم ولادتي مثل باقي اقراني ولم اكن بيضة يوما ما وانا حاليا احيا مع اهلي في داخل البيت وليس فوق السطوح ماعلينا ايوة يااسطي (ده انا ع فكرة).

استقر في المقعد الامامي كعادتي تجنبا لامؤاخذه للاصطدام بولاد الحرام اللذي تتباري امي وجدتي في الدعاء لي لكي يسحقهم الله من طريقي ولكن مع الأسف مع الألم بالرغم من اني دافعه أجرة دبل عشان ابعد عن اولاد الحرام أجدني بذكاء منقطع النظير ادفع دبل لأجلس جنب الحرام نفسه هو بعينه بغباوته.

يبدء السائق رحلتي المجهوله بلعن6 اكتوبر نظرا لوقف الحال مسترسلا ده السادات كان ....... وحسني مبارك ........ وعبدالناصر......... ومصر دي بلد ........ والشعب المصري ده شعب ......... فابدء بشحن نفسي لتلقين هذا الفاسد درس تربيه وطنيه من اللي قلبك يحبه لعل وعسي (لامش يعترف بفضل مصر ولا يتلوي حبا لها تتحرق مصرعلي اللي فيها دلوقتي) يكف عن تشنيف أذاني بمزيد من سبابه البذئ ولكن اكتشف مدي رعونتي عندما يباغته احد الركاب بكلمه (أتقي الله يااخي) فاذا بالسائق يرتفع صوته لاعنا للراكب سلسفيل جدودوه فأدرك ان الحاج ابويا والست الحاجه امي حرام عليه أزج بهم في معركه لا نقاه لهم فيها ولا عصفورة حتي فالتزم الصمت.

نقطع الطريق فاخرج كتاب حسام مصطفي من غلبي لعلني احترم نفسي واقري فيه صفحتين فهو حقا يستحق القرأة فيقاطعني السائق قائلا ياأبله هو انت بتمققي عنيك في المذاكرة ليه انت كويسه من غير مذاكرة خلي المذاكرة دي لحد تاني .............الخ فأغلق كتاب من غلبي وأكف عن المذاكرة قصدي القرأة حتي يكف السائق عن الثرثرة سوري ياعم حسام والله من غلبي فعلا

فيسارع السائق بتشغيل محطه الأغاني وامعانا في ترويق الدي وتظبيط الجي يلف له سيجارة (اها زي مابقول لكم شفت الحشيش بعيني محدش قالي ) اتذكر كل ما ظلته من اعلانات التلفزيون عن التدخين السلبي يعني انا دلوقتي هحشش فعلي طريقه عادل امام في كراكون في الشارع سوف ادخل علي صديقتي ـأسماء انا شربت حشيش ياأسماءـ فلم احسب حساب اي شئ اطلاقا( ولا أم ولا أب سوري ده حشيش يارجالة) ورجعت الأعلانات اللي ظلتها كلها في وش السائق صارخه لو سمحت اطفي السجارة عندي حساسيه توقعت رد فعل قاسي من السائق لكن العين صابتني ورب العرش نجاني فاذا به فقط يكتفي بالنظر الي شذرا ثم يطفائها في تابلوه السيارة ويحتفظ بها في تابلوة السيارة ايضا - اهي هي دي التابلوهات ولا بلاش - فاذا باذاعه الاغاني تشنف اذاني باغنيه حكايه شعب وينفعل الكورال مرددا ( قولناهنبني وادي احنا بنينا السد العالي يااستعمار بنيناه بايدينا السد العالي) ياليت ناصر يبعث ليري سور الصين العظيم اللذي سوف يفصل بيننا وبين اي تقدم وريحه اي حضارة لسوف يشيدة هؤلاء المغيبين بأنفاسهم لا بسواعدهم

نصل الي المحطة السلسليه اتذكر أنجي صديقتي يااااااه ياليتني املك سعه من الوقت حتي املئ عيني يطلتها الملائكيه حقا أشتاق اليها اصحوا من احلامي علي صياح مجموعه منشباب الجيل صارخين _انت تقربي لنورا (نورااااااا مين؟ )_يخرب بيت جمال اهلك ..... الخ وتتعالي صرخاتهم فيما يشبه مظاهرة مطالبين اياي بان اخلع نظارتي الشمسيه _ يحسم الموقف أحد الركاب الله يبارك له صارخا يلا ياولاد الكلب ياقللاله الادب من هنا_ اممممممممم ولاد كلب ماهم معرفوش يربوهم يلبسوا بقي_ فينطلق عبد الوهاب من المذياع صارخا (عاش الجيل الصاعد عاش)

استمر في طريقي مستسيغه (اها مستسيغه طالبه معايا استساغه اصلي باكل الاغاني مش بسمعها) صوت حليم مهللا( يااهلا بالمعارك بنارها نستبارك) فاذا بالسائق يبدء في مارثون عشوائي بينه وبين احد السائقين (من فئه اولاد الحرام برضه علي حد ظني ) متبادلا كل منهم السباب ليحسم الصراع في خناقه اشبه بحرب حاميه الوطيس علي ترانيم حماسيه لأغنيه( خلي السلاح صاح صاحي صاحي) .

لحكمه يعلمها الواحد الجبار تعلن حاله الهدنه بين السائقين متوعدا احداهما الأخر (السواق التاني احنا سوقنا شاطر وهيودينا القناطر مع اني قاصدة المنزله) بس وحياة أمك لأوريك في المنزله فيقاطعه سواقنا الشاطربلفظ اعتراضي أوله مثل اخره فيعقب السواق المتوعد ناظرا لي مش هرد عليك دوقت عشان خاطر نانسي عجرم اللي معاك ويسرع قاطعا الطريق ربما لكي يعد أرض المعركه بالمنزلة والله أعلم ولكن ما علاقتي انا بهذه المتعجرمه فلم يكن لي علاقه بالعجرمه ولا التعجرم يوما ما لامن قريب ولا من بعيد- يلا هو احنا نطول -نشكر الله علي اي حال لعل بركات المتعجرمه انقذتنا من استئناف الحرب والاستشهاد في بلد غريب او أضعف الايمان من الوقوع في براثن الأسر

يبصق سائقنا الهمام علي المذياع نظرا للزقت اللي بيذيعه ( مقلش الزفت هو قال كلمه تانيه وانا عامله فيها عبدة العبيط ) ويحشر الكاسيت بشريط ليفتح حمادة هلال فاه مؤكدا
(حلوين قوي طعمين قوي الله اكبر علينا حلوين قوي طعمين قوي لا قبلنا ولا بعدينا)

فاتمتم معلقه(في سري طبعا) الله يكرمك ياحمادة ياابني قلت اللي نفسي فيه لاقبلنا ولا بعدينا فعلا نحن حالة نادره وحرجه في نفس ذات اللحظه وينوب الست والدة حمادة هلال جزء لابأس به من سباب السائق نظرا للزفت اللي بيقوله ابنها (هي نفس الكلمه واولها خ بقي يعني لا الجيل القديم عاجب ولا الجديد نافع) يؤثر السائق غلق الكاسيت والمذياع وحتي غلق افواه الزبائن صارخا صدعتونا كنا ناقصينكم (بيسب الدين علي فكرة) ناظرا الي ولا انت رائيك ايه ياحلوة اهز رأسي بالأيجاب حلوة حلوة المهم ان اعيش دلوقتي

أصل الي المنزله وده علي فكرة بفضل بركه دعا الوالدين ليستقبلني صوت اصاله صارخا من احد الحانات بجوار المحطه (متغربين يااحنا متغربين تجري السنين واحنا في جرح السنين ) انطق الشهادتين حامده الله شاكرة فضله علي سلامه الوصول لو كنت بعرف ازغرط كنت رقعت زغروطين ولكن اشعر فعلا بالغربه ليس لاني حاليا علي ارض المنزله الشقيق وانا(made in Aga) عادي فاانا اعلم جيدا أن التجارة الأدميه فيما يسمونها بالهجرة هي عمد اقتصادنا المصري ولكن اشعر بالغربه عن هذا الوطن عن هذه الرقعه التي اكدوا لنا مجازا (أن دي أمكم مصر) .

بالفعل اصعب شئ انك تكون ميقن ان هذه السيدة امك ولكن كل تصرفاتها تنم علي أنها مرات ابوك .

6 أكتوبر 2009 ميكروباص المنصورة المنزلة
رجعت في عربية ملاكي متتوقعوش اي احداث لرحلة العودة

اللي بلدهم تقولهم ياعورة من حق باقي الدول تعلب بهم الكورة

2009-10-07T15:30:00.001-07:00

لا كده قله ادب

الاول العبده لله مش مع النقاب اصلا ولكن مش ضده وعندي زميلات منتقبات نقدر نقول عددهم مش قليل كذلك عندي اصدقاء غير محجبات وانتيمتي مش مسلمه حتي وانا علي راي ابويا من الغفير اللي عامل زي اللي رقصت ع السلم يعني اعتقد نظرتي للامور محايده الي حد ما لكن والحق لله واحقاق للحق شعرت بجرح كبير من الاحداث المتلاحقه ضد النقاب والمنتقبات لكوننا وبقولها وانا مكسوفه من اللي بيحصل المفروض دوله اسلاميه يعني هيضطهدوا المسلمين في بلادهم كمان (انا عاوزه بقي مسلمين المهجر يسمعوني صوتهم هأهأ) من اول شيخ الازهر واهانته لطالبه منتقبه وطلاب المدن الجامعيه بالقاهرة ومنعهم من المدن كذلك طلاب المعاهد الازهريه ومنعهم من ارتداء النقاب ...................... اقولكم سيبنا من النقاب خالص

تعالوا نقلب الصورة

يطل علينا بالبلدي صبح وليل وليل وصبح كده مجموعه من المفتين مشتقه من الفته ايوه ام رز ولحم بحبها قوي واللي عندهم التهابات حاده في خلايا المخ ويهاجمون الحجاب بكل مااوتوا من قوه كأن الحجاب ده مرات ابوهم

علي سبيل المثال لا الحصر

الفنان القدوة يهاجم الست الغلبانه شهيرة (اللي بالمناسبه بصفه شخصيه مبستلطفهاش اصلا كانت محجبه ام لم تكن )لمجرد انها قالت بعد محاولات متكرره من مذيعين البيت بيتك لجرها والضغط عليها عشان تقول ان التمثل حرام لكن الست ماقلتش وقالت لهم انا سبت التمثيل عشان اقرب من ربنا اكتر قوم ايه يتصل الفنان القدوة وبعد مايمسح بالست الفاضله شهيره البلاط يقوم قايل ان عملي بيقربني من ربنا ( ففي قراره نفسي ومخبيش عليكم كلكم اولادي برضه قلتله حمرررررررررررا عمل ايه ياابو عمل اللي بيقربك من ربنا هل كاس الخمرة اللي في ايدك في معظم الافلام بيقربك من ربنا العظيمات اللي انت بتجيبهم لنا ع الشاشه من اول يسرا مرورا بوفاء عامر وصولا الي داليا البحيري ونيكول سابا دول كلهم بيقربوك من ربنا ) لكن رجعت وتذكرت قوله الكريم اللي مصبرني علي اي عاه بتقابلني

يَا أَيُّهَا الَّذِينَ أمنوا لا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ وَلا تَلْمِزُوا أَنْفُسَكُمْ وَلا تَنَابَزُوا بِالأَلْقَابِ بِئْسَ الاسْمُ الْفُسُوقُ بَعْدَ الإِيمَانِ

ولكن

خلينا نقول ان الست شهيرة دي دكتوره وقالت ان مسؤليه عملي كدكتورة مش مخلياني اقرب من ربنا واعبده كويس وان جوزي ربنا يخليه قادر يصرف عليه فقررت اني اسيب الدكتره عشان اقرب من ربنا هل معني ذلك ان الست قالت ان الدكتره حرام وان مثلا الحج الجبلي المفروض يتصل يمسح بكرامتها الارض ويقولها ان انا عملي بيقربني من ربنا ابداااااااااااااااااااااا ياحضره الفنان القدوة موقفك صراحه لاينطبق عليه الا المثل القائل( اللي علي راسه بطحه) ونرجع ونقول انت حر ياباشا فيما تعتقد بوس براحتك احضن براحتك شيل علي اكتافك براحتك طالما انت مسؤل مسؤليه كامله امام الله عما تفعل واللي يقول غير كده يبقي ابن كلب لا يحترم حريه الأخرين ويستاهل ضرب الجزمه

تطل علينا الست الفاضله المش مخرجه ( اللي بالمناسبه انا عمري ماشفت لها فيلم عليه الطلا ولا ليه مضمون ولا رؤيه أخراجيه اصلا يعني اصلا مابحبهاش كمخرجه بغض النظر عن افكارها ومظهرها ) وترجع في وشنا فتوه اللهم لا تكتب علي الحجاب اللهم امين (كل اللي يقرأ يقول اللهم امين) ياشيخه ولا توعي تكوني في ذمرة المحجبات ماهو ربنا يابني ادمه يقدر يخليكي تتولدي بالحجاب اصلا ولكن ده اختبار عشان يشوف عبده اللي بيطيعه من عبده اللي بيخالف أوامره عبده اللي يقدر يتغلب علي نفسه وهواه من عبده الضعيف اللي بينساق وراء نفسه وبتتحكم فيه أهوائه (الحجاب يامعلمه فرض فرض مش للتجربه يعني لو مقدرناش في مده بسيطه نطوع نفسنا علي لبسه منفضلش طول عمرنا نقول لما نقتنع لان دي معصيه من نفسك انت منظلمش الشيطان معانا يارجاله كده هنموت واحنا مش لابسينه فرض يعني مفيهوش فصال ينفع نفاصل ربنا في الصلاة مثلا الظهر اربع ركعات نقول لا نخليه ركعتين ولا بلاش الضهر كفايه العصر ) وترجع تقولك محدش يفرض الحجاب عليه (علي اساس ان انا او الست الوالدة امي يعني مثلا اللي فرضه عليها الحجاب الست اللي داخله علي الستين دي متعرفش ان ربنا هو اللي فرض عليها الحجاب )دي حريه شخصيه (يعني مش فرض) وننزل لمستواكي الفكري المتدني خليها علينا يعني قصدك ان مفيش اي بنوا ادم يقولك البسي الحجاب حرام عليكي تبيني رجلك وصدرك وباقي اعضائك وماله اسم الله عليكي يامعدوله الله ينور عليكي صح بدل انت مسؤله عن افعالك قدام ربنا يبقي ابن كلب اللي يقولك حاجه زي كده ويستاهل ضرب الجزمه

يطل علينا شيخ المنصرالمعلم اللي بدأت عنده الليله (بالمناسبه بقي احب اسجل شماتي فيه بما انه سقط في اليونيسكو ومع ان المفروض اللهم لا شماته لكن انا هستحمل ذنب شماتي فيه يارب لان مش قادرة اخبيها) ويرجع في وشنا فتوة الحجاب مش فرض وان الست مامته كانت مش محجبه مش عارفه ايه اللي دخل الست مامته في الموضوع او في الترجيع اللي خارج من بقه ده وكائن الست مامته دي كانت السيده عائشة رضي الله عنها وياسيدي يبقي لنا ان نكن كل الاحترام للست مامتك واللي يدوس علي طرف الست مامتك ويشكك في ايمانها واخلاقها ينضم لذمرة ولاد الكلاب اللي عاوزين ينضربوا بالجزمه السابق ذكرهم

كده بيس قوي دول اللي الذاكره سعفاني بيهم وفي غيرهم كتير بس يبقي لنا ان نقول ان كل هؤلاء علي باطل كما علمنا من القران الكريم وسنه رسولنا الكريم عليه افضل الصلاة والسلام لكن بعيدا عن الدين والاسلام عشان نبقي بنتناقش بالمنطق يبقي واجبنا ننصحهم يافنان ياقدوة بلاش الخمرة والبانجو والاكسات اللي في افلامك لانك قدوه والشباب بيقلدك والحاجات دي بتخلي الشباب مدروخ ولا عارف ينتج ولا ينيل وده بيقصر علي المجتمع وهكذا متنصحوش يبقي يجب ان نحترمهم ونكفل حريتهم طالما هما مسؤلين مسؤليه كامله عن افعالهم امام الله وهو اللي بيحاسبهم

نرجع بقي لموضوع النقاب وكون المنتقبات مش علي حق اصلا وغلطانين من طرف اطول شعرايه في راسهم لصباع رجليهم الصغير(وده ياجماعه مجازا وغير معقول بس نمشيها معقول عشان نبقي بنتناقش بالمنطق ) يبقي علينا ان احنا ننصحهم علي اساس مثلا ان النقاب بيعوق الحركه مثلااو مثلا بيخلينا مش عارفين دي ست ولا راجل وهكذا متنصحوش يبقي واجبنا نحترمهم ونكفل حريتهم طالما هما مسؤلين امام الله وهو اللي بيحاسبهم واللي يقولهم غير كده يبقي ينضم لذمره ولاد الكلب اللي عاوزين ينضربوا بالجزمه السابق ذكرهم اي ان كان منصبه

معاني الكلمات

الفنان القدوة :عادل الامام

المش مخرجه : ايناس الدغيدي

شيخ المنصر :فاروق حسني

ومذكرتش اسمهم اصلا لانهم يعنوا لي لاشئ هوا لامؤاخذه

الاستثمار مستقبل بلدنا

2009-09-29T02:50:00.000-07:00

الست ام محمود اشترت عشره ارغفه بعد ماباتت يوم كامل في الفرن اللي علي اول شارعهم, حطتهم للواد محمود ابنها عشان يتغدي قبل مايروح يدفن الواد كريم اللي لسه مطلعينه ميت من بلاعه مفتوحه , الواد محمود جاله تسمم غذائي لان العيش مخبوز من قمح فاسد دخل المستشفي يعمل غسيل معده سرقوا كليته ,لما اشتكي قالوله هتعمل بيها ايه اللي زيك ميت ميت يابالكبد الوبائي او السرطان او وهو بيعدي طريق سريع او لما البيوت تتهد عليهم الكليه راحت للي يستحقها , الواد الكلام حز في نفسه وقرر ينتحر جه يفتح الانبوبه ملقاش غاز عشان الغاز بيتصدر لاسرائيل الواد اعصابه تعبت وقرر يهج من البلد ويسيبهلهم ارض بور بسبب االاسمده والمبيدات اللي بتدمر التربه والقبض علي الفلاحين, العباره اللي مسافر عليهاغرقت به هو وشويه ناس ولاد تيت وده بدوره قلل من الكثافه السكانيه ومكلفش شركات التامين فلوس كتير لان الناس دي ولاد تيت , وبالطبع ده لم يرهق مزانيه الدوله الست ام محمود نظرها ضعف بسبب بكاها علي ابنها ولاد الحلال نصحوها بعمليه في مستشفي حكوميه الست ماتت بسسب دم فاسد نقلوه لها لما جم يدفنوها لقوا جثه الست متقلبه ومفيهاش اعضاء لما سالوا فين اعضاءها قالولهم احتجزوها لتسديد ديون مصر عم ابو محمود كان مستلف 500 جنيه عشان يجيب للست ام محمود فراخ فيها انفلونزا طيور تتقوت بهم بعد العمليه وبالطبع صرف الفلوس علي دفنه ام محمود ولما معرفش يسدد خد 3 سنين حبس في قضيه شيكين كل شيك بمبلغ وقدره 250 جنيه الراجل ربنا افتكره في السجن, لما الظباط عذبوه عشان يعترف علي مكان جوز بنته دلال اللي مربي دقنه ودي احد الدلائل اللي بتدينه وتجعله من الرعيل الاول المتهم في تفجيرات الحسين ,الواد علاء قرر يسيب لهم البلد بتاعتهم غرقانه في انفلونزا الخنازير يشبعوا بها ,وخاصه بعد مااخوه الصغير عادل مات لما امين الشرطه ضربه بالرصاص في وسط الشارع وولع في جثته عشان الواد دافع عن اخته دلال اللي امناء الشرطه رموها من خامس دور بعد مااغتصبوها لانها بتعطلهم عن تاديه مهمتهم لما جم يسالولها علي جوزها ابو دقن بتاع تفجيرات الحسين السابق ذكره ولكن علاء اتعلم من اخطاء اللي سبقوه في الطفشان من البلد, فقرر انه هو يسافر بلد اروبيه علي قارب صغير حاجه سمبتيك كده وخفيفه بلا عبارات بلا وجع قلب ولكن تعددت الاسباب والغرق واحد الواد لحق ابوه وامه واخواته وده في اطار سياسه الدوله لترسيخ مفهوم اسره سعيده مترابطه, وكل الجثث دي طبعا اتحولت علي مشرحه زينهم االلي بيشتغل فيها سعيد ابن عم اسماعيل اللي فاتح قهوه في شارعكم لمه كل العواطليه اللي ملهمش شغل واسعارها حنينه مش زي الكافيهات .

عرفت ايه فايده القمح الفاسد ................................................؟!!!!!!!!

نقطه ومن اول السطر

2009-09-27T15:51:00.000-07:00